_జగద్గురు ఆదిశంకరాచార్యుల ప్రశ్నోత్తర రత్న మాలిక_

 _జగద్గురు ఆదిశంకరాచార్యుల ప్రశ్నోత్తర రత్న మాలిక_

*1.ఇహలోకంలో కోరిన కోర్కెలు తీర్చే చింతామణి లాగా దుర్లభమైనది ఏది?*

జ: ప్రియవాక్కులతో కూడిన దానగుణం, గర్వంలేని జ్ఞానం.

క్షమాగుణం కలిగిన శూరత్వం, ధనంతో పాటు త్యాగ గుణం

ఈ నాలుగింటినీ చతుర్భద్రం అంటారు.

*2.మెరుపులా తాత్కాలికమైనది ఏది?*

జ: చెడ్డ వారితో సాన్నిహిత్యం, యవ్వనం.

*3.కలికాలంలో కూడా తన  గౌరవాన్ని నిలబెట్టే వారు, శీలం నుంచి విచలితం కాని వారు ఎవరు?*

జ: సజ్జనులే!                                                                  

*4.బాధ పడ వలసిన విషయం ఏది?*

జ: ఎంత వైభవమున్నా దయనీయంగా బ్రతకడం.

*5.ప్రశంసనీయమైనది ఏది?*

జ: ఉదారగుణం                                                    

*6.మేధావులకు సైతం పూజ్యుడు ఎవరు?*

జ: ఎల్లప్పుడూ సహజంగానే వినయవంతుడై ఉండే వాడు.                                                                                 

*7.వంశకీర్థి అనే కమలాన్ని వికసింపజేసే సూర్యుడు ఎవరు?*

జ: ఎన్నో సద్గుణాలున్నా నమ్రత కలిగి ఉండే వాడు.      

*8.ఈ లోకం ఎవరికి సదా లోబడి ఉంటుంది?*

జ: ప్రేమతో, మేలు చేకూర్చే మాటలు పలికే వానికి, ధర్మాచరణలో నిమగ్నుడై ఉండే వాడికి

*9.లక్ష్మీ దేవి ఎవరిని ఇష్టపడుతుంది?*

జ: సోమరితనం లేని వారిని, నీతి బద్ధమైన ప్రవర్తన కలిగి వారిని..                                                      

*10.లక్ష్మీ దేవి ఎవరిని వెంటనే విడిచి పెడుతుంది?*

జ: సోమరిని, బ్రాహ్మణ, గురు, దేవతలని నిందించే వారిని.                                                                

*11.ఎక్కడ నివాసముండాలి?*

జ: మంచి వాళ్ళ చెంత. లేదా కాశీధామంలో

*12.ఏటువంటి ప్రదేశంలో ఉండకూడదు?*

జ: నిందారోపణలు చేసే ప్రజలున్న, లోభులైన నాయకులున్న చోటును వదిలిపెట్టాలి.

*13.అతి చిన్నతనం కలిగించే పనికి మూలమేమిటి?*

జ: విషయాసక్తుడైన పామరుడిని యాచించడం.     

*14.వీరుడు, శూరుడు ఎవరు?*

జ: కామదేవుని బాణాలు తగిలినా నిశ్చలంగా, ధృడంగా ఉండే వాడు.                                          

*15.కన్నులున్నా అంధులెవరు?*

జ: పరమేశ్వరుని పైన, వేదాలు, పరలోకం పైన విశ్వాసం లేనివారు.

( శ్రీపీఠం నుండి )