*శ్రీ ఆదిశంకరాచార్య విరచితం ధన్యాష్టకం....!!*
1) తజ్జ్ఞానం ప్రశమకరం యదిన్ద్రియాణాం తజ్జ్ఞేయం యదుపనిషత్సు నిశ్చితార్థమ్ ।
తే ధన్యా భువి పరమార్థనిశ్చితేహాః శేషాస్తు భ్రమనిలయే పరిభ్రమన్తః ॥
2) ఆదౌ విజిత్య విషయాన్మదమోహరాగ- ద్వేషాదిశత్రుగణమాహృతయోగరాజ్యాః ।
జ్ఞాత్వా మతం సమనుభూయపరాత్మవిద్యా- కాన్తాసుఖం వనగృహే విచరన్తి ధన్యాః ॥
3) త్యక్త్వా గృహే రతిమధోగతిహేతుభూతామ్ ఆత్మేచ్ఛయోపనిషదర్థరసం పిబన్తః ।
వీతస్పృహా విషయభోగపదే విరక్తా ధన్యాశ్చరన్తి విజనేషు విరక్తసఙ్గాః ॥
4) త్యక్త్వా మమాహమితి బన్ధకరే పదే ద్వే మానావమానసదృశాః సమదర్శినశ్చ ।
కర్తారమన్యమవగమ్య తదర్పితాని కుర్వన్తి కర్మపరిపాకఫలాని ధన్యాః ॥
5) త్యక్త్వఈషణాత్రయమవేక్షితమోక్షమర్గా భైక్షామృతేన పరికల్పితదేహయాత్రాః ।
జ్యోతిః పరాత్పరతరం పరమాత్మసంజ్ఞం ధన్యా ద్విజారహసి హృద్యవలోకయన్తి ॥
6) నాసన్న సన్న సదసన్న మహసన్నచాణు న స్త్రీ పుమాన్న చ నపుంసకమేకబీజమ్ ।
యైర్బ్రహ్మ తత్సమముపాసితమేకచిత్తైః ధన్యా విరేజురిత్తరేభవపాశబద్ధాః ॥
7) అజ్ఞానపఙ్కపరిమగ్నమపేతసారం దుఃఖాలయం మరణజన్మజరావసక్తమ్ ।
సంసారబన్ధనమనిత్యమవేక్ష్య ధన్యా జ్ఞానాసినా తదవశీర్య వినిశ్చయన్తి ॥
8) శాన్తైరనన్యమతిభిర్మధురస్వభావైః ఏకత్వనిశ్చితమనోభిరపేతమోహైః ।
సాకం వనేషు విజితాత్మపదస్వరుపం తద్వస్తు సమ్యగనిశం విమృశన్తి ధన్యాః ॥
9) అహిమివ జనయోగం సర్వదా వర్జయేద్యః కుణపమివ సునారీం త్యక్తుకామో విరాగీ ।
విషమివ విషయాన్యో మన్యమానో దురన్తాన్ జయతి పరమహంసో ముక్తిభావం సమేతి ॥
10) సమ్పూర్ణం జగదేవ నన్దనవనం సర్వేఽపి కల్పద్రుమా గాఙ్గం వరి సమస్తవారినివహః పుణ్యాః సమస్తాః క్రియాః ।
వాచః ప్రాకృతసంస్కృతాః శ్రుతిశిరోవారాణసీ మేదినీ సర్వావస్థితిరస్య వస్తువిషయా దృష్టే పరబ్రహ్మణి ॥
॥ ఇతి శ్రీమద్ శ్రీ శంకరాచార్యవిరచితం ధన్యాష్టకం సమాప్తమ్ ॥...🙏🌹
No comments:
Post a Comment